Гэмтэл согог судлалын үндэсний төв болон “Eejii.org” сангийн хамтын ажиллагааны дагуу 2025 оны зургадугаар сарын 20-ны өдрөөс эхлэн хоёр сарын хугацаанд сайн дурын ажилтнууд тус төвийн Амбулаторийн тасаг, Яаралтай тусламжийн тасагт хөтөч, зөвлөн туслагчаар ажилласан билээ. 
Энэхүү үйл ажиллагаа нь зуны улирал, тэр дундаа үндэсний их баяр наадам, тэмдэглэлт ойн өдрүүдэд ачаалал нь эрс нэмэгддэг ГССҮТ-ийн эмч, сувилагч, эмнэлгийн мэргэжилтнүүдэд тусалж, эрүүл мэндийн тусламж үйлчилгээг иргэдэд илүү ойр, хялбар, хүртээмжтэй хүргэх зорилготой юм. 
Тиймээс сүүлийн гурван жилийн хугацаанд хамтран ажиллаж буй “Eejii.org” сангаар дамжуулан иргэдийн хөл хөдөлгөөн их, ачаалал өндөр тасгуудад идэвхи зүтгэлтэй ажилласан сайн дурын ажилтнууддаа зориулан ГССҮТ болон Улсын нэгдүгээр төв эмнэлгээс хамтран “БАЯРЛАЛАА” талархлын арга хэмжээ зохион байгууллаа. 
Тус арга хэмжээнд ГССҮТ-ийн Үйл ажиллагаа хариуцсан дэд захирал Б.Батзориг, “Eejii.org” сангийн захирал Э.Должинсүрэн, УНТЭ-ийн Амбулаторийн тасаг хариуцсан их эмч н.Номин-Эрдэнэ нар оролцож, сайн дурын нийт 82 ажилтанд талархал илэрхийлэн сертификатыг нь  гардуулж өгсөн юм.
Сайн дурын ажилтнуудын хувьд, дээрх хоёр сарын хугацаанд Гэмтэл согог судлалын үндэсний төвд 53, Улсын нэгдүгээр төв эмнэлэгт 29 нь ажилласан байна.   
Өрөөл бусдад болон өөрсдийн бүтээж буй нийгэмд үнэ цэнээ нийлүүлсэн хамгийн ТОМ зүрхтэн болох САЙН ДУРЫН АЖИЛТНУУДДАА БАЯРЛАЛАА. 
Өдөр бүр амьдралын сайхныг мэдэрч, хүн бүр эерэг байж ХАЙР ДҮҮРЭН ЕРТӨНЦИЙГ ХАМТДАА БҮТЭЭЕ.